Во 150 нови еколошки автобуси за година и пол ќе возат македонските граѓани. До крајот на март ќе се знае фирмата која ќе ги испорача градските автобуси, од кои 100 ќе бидат за Скопје, а останатите 50 за другите градови каде што има градски превоз. Министерствто за транспорт го распиша тендерот кој вклучува и 75 станици за полнење на автобусите.
Најповолниот понудувач има обврска да произведе и да испорача 30 автобуси во рок од 6 месеци, 60 автобуси за една година или вкупно 150 за година и пол.
- „Ова е дел од стратешкиот план за трансформација на градскиот сообраќаен систем и подигнување на економичноста на транспортната мрежа. Со оваа инвестиција испраќаме јасна порака во борбата против аерозагадувањето и подобување на условите за граѓаните во делот на користење на јавниот превоз како долгорочна инвестиција во транспортниот сектор и јавните услуги“ – соопшти Министерството за транспорт.
Со набавката на новите 100 автобуси, конечно ќе се воведе ред во јавниот градски превоз. Скопјани ја поздравуваат одлуката на Владата и градските власти за обновување на флотата на ЈСП и очекуваат старите и дотраени автобуси конечно да се тргат од улиците.
Во моментов ЈСП располага со околу 180 автобуси, но поради честите дефекти и поправки, тие се недоволни за да ги задоволат потребите на скопјани.
Покрај набавката на новите автобуси, откочен е и проектот за Брз автобуски превоз (БРТ). Од Владата најавија дека е добиено писмо од Европската банка за обнова и развој, со што до март Град Скопје треба да формира проектна единица и да го измени планот за јавни набавки. Со кредитот за овој проект ќе бидат набавени дополнителни 30 автобуси, за што градоначалникот Ѓорѓиевски рече дека набрзо ќе се распише тендер. Скопјани велат дека со ставањето во функција на БРТ, времето на возење до посакуваните дестинации значително ќе се намали.
Анкета 2:
Скопјани оваа година ќе ја добијат и првата траса од градскиот воз. Рутата од Зелениково до Скопје ќе се поминува за 25 минути што дополнително ќе треба го олесни сообраќајниот хаос во главниот град.
