Прво негодуваа, па се бунтуваа, но сега работите си легнаа на брашно. Возачите полека, но сигурно се навикнуваат на системот „Сејф Сити“. За време на вторите седум дена од месецот февруари казните кои биле изречени се за 10% помалку во споредба со првата недела од истиот месец. Што практично значи дека улиците во Скопје, но и другите места каде е воведен системот се далеку побезбедни.
Според МВР, ако во првата недела од месецов биле регистрирани вкупно 4991 казни, за време на втората биле констатирани 4490 сообраќајни прекршоци. Во одбнос на возење со брзина поголема од дозволената, во споредба со првата недела од месецов, бројот на казни е намален за 8%, а за минување на црвено светло за цели 79%. Бројот на констатирани прекршоци за управување на возило без сообраќајна дозвола во првата недела броел 154, а за време на втората брои 160, што е приближно ист во споредба на двете недели.
„Во периодот од 09.02.2026 до 15.02.2026 од страна на системот „Безбеден град“ на подрачјата на градовите и Коридорите каде се поставени камери, регистрирани се вкупно 4.490 прекршоци, што претставува намалување за 10% во споредба со првата седмица во месец февруари кога беа регистрирани 4.991 прекршок.
Од вкупниот број на регистрирани прекршоци најголемиот број се за управување на возило со брзина поголема од дозволената 4.297, потоа за минување на затворен сигнал (црвено светло) 33, а за управување со возило со измината важност на сообраќајната дозвола констатирани се 160 прекршоци.“- вели протпаролот на МВР, Гоце Андреевски.
Меѓутоа МВР не дејствува само преку новиот безбедносен систем. Сега сообраќајната полиција има време и простор да врши друг вид на контроли. Па така од почетокот на февруари до сега на територијата на цела држава се одземени вкупно 90 возила поради управување без положен возачки испит, изречена мерка за забрана за управување или биле под дејство на алкохол.
„Од нив 14 возила се одземени на територија на СВР Тетово, 13 возила се одземени на територија на СВР Велес, 12 возила на територија на СВР Битола, по 11 на територија на СВР Струмица и СВР Куманово…“- вели портпаролот Андреевски.
Пад има и во однос на сообраќајните несреќи. МВР апелира до граѓаните да ги почитуваат сообраќајните правила и прописи со цел да се обезбедат безбедни улици за секој учесник во сообраќајот.
