СДСМ ја обвини Владата за, како што велат, „историска измама“ кон пензионерите, поради најавата за линеарно зголемување на пензиите за 1.000 денари од септември.
Пратеничката Јована Тренчевска посочи дека ваквото решение ќе ги оштети пензионерите двапати – еднаш сега, во септември, и повторно во март идната година, со уште едно фиксирано зголемување наместо редовно усогласување според инфлацијата.
„Ако владата не го менуваше законот, пензиите во септември ќе се зголемеа за околу 5 проценти. Со ова линеарно зголемување, пензионерите губат повеќе, особено оние со повисоки пензии,“ рече Тренчевска.
На ова остро реагираше ВМРО-ДПМНЕ, оценувајќи дека СДСМ и Тренчевска, како поранешна министерка, немаат морално право да зборуваат за грижа кон пензионерите.
„СДСМ и Тренчевска пензионерите ги доведоа на раб на егзистенција. Се паметат протестите со празни тегли, кога народот им кажа дека пензиите не се доволни ниту за зимница,“ соопштија од партијата.
Според ВМРО-ДПМНЕ, за само 18 месеци од преземањето на власта, пензиите веќе се зголемени за 5.000 денари, а со најавеното линеарно зголемување во септември и март, ќе пораснат за вкупно 7.000 денари.
„Пензионерите сега имаат партнер во оваа Влада. Вреднуваме труд, решаваме проблеми и создаваме услови за достоинствена старост,“ додаваат од ВМРО-ДПМНЕ.
