Процесот на проширување треба да остане праведен и предвидлив, а постигнатиот напредок на земјите кандидати да се оценува според објективни европски критериуми. Земјата останува целосно посветена на реформите и на членството во Европската Унија – истакна вицепремиерот и министер за европски прашања Беким Сали на конференцијата за Западен Балкан во Виена на покана на австриската министерка за Европа, интеграција и семејство, Клаудија Бауер.
Во дискусиите за иднината на Западен Балкан, како што соопшти МЕП, министерот Сали истакнал дека процесот на проширување треба да носи видливи придобивки за граѓаните и пред членството.
Сали посебен акцент ставил на младите и на потребата од повеќе можности за образование, стручна обука, практикантство, истражување и размена со европските партнери.
– За нашите млади европската иднина треба да значи реални можности да учат, да се развиваат и да ја градат својата иднина во својата земја – истакна Сали.
Говорејќи за постепената интеграција, министерот ги посочил олеснувањето на трговијата преку зелените коридори, учеството во СЕПА и дигиталната соработка како примери за конкретните придобивки што приближувањето кон Европската Унија може да им ги донесе на граѓаните и компаниите.
Тој нагласил дека поширокото учество во програмите, политиките и единствениот пазар на ЕУ треба да се заснова на јасни критериуми, спроведени реформи и почитување на владеењето на правото.
Од МЕП додаваат дека министерот исто така се заблагодарил на Австрија за организацијата на конференцијата и за континуираната поддршка на европската перспектива на Западен Балкан.
