Рекорден буџет за министерството за образование во 2025 година. Владата за финансирање на образованието и науката одвои над 600 милиони евра ( 617 886 178), што според министерката Јаневска е најмногу досега. Годинава се предвидени повеќе пари за капитални инвестиции, повисоки плати за наставниците и професорите како и за вработените во високообразовните институции. Министерството ќе ги реконструира дел од училиштата кои се оставени во субстандардни услови и ќе вложува во квалитетот на образованието за да нема веќе задоцнети ученички генерации.
„Годинашниот буџет е за 6 милијарди денари поголем од првичниот во 2024. Зголемени се блок дотациите за сите општини за 1,5 милијарди денари, затоа што е најавено покачување на платите на вработените во училиштата и тоа за 7% од месец март. Повисоки плати од месецов добиваат и вработените во високообразовните установи и тоа наставниот кадар за 14%, а ненаставниот за 8%“, кажа министерката Јаневска.
Министерството одвојува повеќе пари за студентите, односно се издвојуваат речиси 30 милиони евра (1,8 милијарди денари ) наместо досегашните 22 милиони евра ( 1,4 милијарди денари). Покрај зголемување на висината на студентскиот оброк, бесплатниот јавен превоз, ќе се реконструираат и студентските домови за да се обезбедат достојни услови за студентите, а се издвојуваат и повеќе пари за ученичкиот стандард.
Два дома веќе се реконструираат и ќе се завршат до крајот на годината, а целиот процес со опфат на сите домови ќе заврши во текот на мандатот на Владата ….. Предвидено е и зголемување на средствата за ученички стандард за 110 милиони денари, односно обезбедени се 621 милион денари, порача Јаневска.
Министерката најави дека со дополнителни 500 милиони денари од Светска Банка за кои се уште се преговара ќе се адаптираат 100 училишта за работа во една смена . Двојно е зголемен и буџетот за науката, односно од скоро 6 милиони евра, на над 11 милиони евра.
Министерката најави и дека се работи на стопирање на процесот на нарачка на магистерски и докторски трудови со кои потоа студентите добиваат диплома. Во неколку државни универзитети веќе биле одземени неправилно стекнати звања. Ќе се воведе мониторинг на она што се случува во високото образование, а при крај е и новиот закон за високо образование.
