Разрешен е началникот на Полициската станица во Демир Хисар поради дисциплинска постапка која ѝ ја води Внатрешната контрола на МВР. Оттаму информираат дека Одделот за внатрешна контрола извршил проверка по објавеното видео од претресот во домот на директорката од Демир Хисар. Во текот на проверките е констатирано непрофесионално и неетично однесување на началникот. Со цел целосна непристрасност и објективност на истрагата, началникот ќе биде разрешен од функцијата, велат од МВР.
Објавеното видео, во кое началникот инсистираше директорката на носилки да биде спроведена во полициска станица за испрашување без да има налог од Обвинителството за итност, предизвика лавина реакции кај јавноста и политички препукувања меѓу партиите. Опозицијата обвинуваше дека началникот е заштитен од Министерот за внатрешни работи. Од Министерството, пак, соопштија дека јасно го осудуваат секој облик на насилство, незаконско или непрофесионално постапување.
