Општина Куманово го продолжи јавниот повик за избор на „Сувенир на општина Куманово“ за дополнителни 15 дена. Од Секторот за локален економски развој информираа денеска дека на повикот можат да се пријават заинтересирани правни и физички лица со свои идеи и изработки. Понудените изработки треба да исполнуваат повеќе одлики и со автентичните трудови да придонесат кон креирањето на производ кој ќе го отсликува карактерот на градот, во насока на зголемена промоција. Како што наведуваат од Секторот за економски развој, општината на овој начин поддржува идеи и автентични трудови.
Сувенирот мора да ги содржи елементите на препознатливост и да ја отсликува традицијата и културно-историските, духовни, материјални и природни богатства на градот Куманово, да биде адаптиран за масовно производство и наменет за туристичка промоција на градот. Сувенирот треба да биде изработен од материјал, големина и боја според замислата на авторот, да се користат стабилни и еколошки прифатливи материјали, керамика, камен, метал, дрво, стакло, глина, гипс, текстил и други. Самата идејната концепција, развојот и начинот на изработка на сувенирот, техничките услови за изработка и материјалот од кој е изработен треба да бидат текстуално образложени. Како што наведуваат од надлежниот сектор, наградата „Сувенир на општина Куманово“ е една и изнесува 150.000 денари со вклучен данок на додадена вредност.
-Првиот дел во износ од 30.000 денари ќе биде наменет за добитникот за мотивација и вложен труд. Вториот дел од наградата, добитникот на наградата во меѓусебен потпишан договор со Општина Куманово, зависно од проценетата вредност на трудот, должен е да достави одредена количина на сувенирот на општина Куманово во износ од 120.000 денари- наведуваат од општината.
Изработениот сувенир заедно со текстуално образложение на идејната концепција, опис на материјалот од кој е изработен сувенирот и проценета вредност за еден примерок од трудот во денари со вклучен данок на додадена вредност, треба да се достави во затворен плик (кутија) на адреса: Општина Куманово, 11 Октомври бб.
За „Сувенир на општина Куманово“, општина Куманово формираше Комисија која ќе одлучува врз основа на горенаведените критериуми и резултатите ќе ги објави најдоцна во рок од 15 дена од завршувањето на постапката.
