На списокот на влијателни членови кои сметаат дека партијата се движи во погрешен правец, сега се додава и пратеничката и поранешна министерка за одбрана, Славјанка Петровска. Во честитката по повод 35-годишнината на партијата, таа преку порака на социјалните мрежи повика на промени, предупредувајќи дека во спротивно партијата може да исчезне.
„Сме губеле, сме победувале, но секогаш сме се менувале – на подобро, се разбира. Промената на подобро е неопходна, суштинска, за да можеме да успееме, да победиме, за Македонија. Ако не се промениме, ќе исчезнеме и затоа час поскоро да започнеме со трансформација“, напиша Петровска.
Иако не директно како дел од останатите функционери, ова претставува јасна порака до Филипче дека се потребни промени во партијата.
Инаку, дел од оние кои досега јавно го кренаа гласот против лидерот на СДСМ, како на пример Деспотовски, Шилегов и други, беа обвинети дека работат во интерес на ВМРО-ДПМНЕ.
