Директорот на „Комунална хигиена“, Рустеми, и неговиот раководител во претпријатието, Саити, заминуваат зад решетки во затворот Шуто Оризари, откако судот им одреди 30-дневен притвор.
Одлуката следи откако Обвинителството официјално отвори истрага против нив и побара тие да бидат ставени зад решетки поради опасност од влијание врз сведоците и можност за повторување на делото.
Инаку, Обвинителството ги товари Рустеми и Саити дека, со тоа што го оставија Скопје да потоне во ѓубре и да се претвори буквално во депонија, дозволиле ширење на заразни болести и директно го довеле во опасност животот и здравјето на граѓаните.
Формално ќе се гонат за делото „загрозување на животната средина со отпад“.
„Со пропуштање на целосниот надзор над собирањето и транспортирањето на комунален отпад, како и со непрописно управување со отпадот, тие овозможиле во текот на месецов да се создадат мали депонии, со што предизвикале значително оштетување на квалитетот на почвата, воздухот и водата и го довеле во опасност животот и здравјето на луѓето од предизвикување заразни или други болести“, велат од Обвинителството.
Засега останува непознато дали истрагата ќе биде проширена и ќе опфати други лица. Од МВР и Обвинителството не одговорија директно дали истрагата ќе ја опфати и актуелната градоначалничка Данела Арсовска или други вработени кои биле надлежни за редовното празнење на контејнерите. Велат – засега пријава има само за овие двајца.
