Почетниот медиумски мониторинг за комуникацијата на Министерството за култура и туризам, шест единици на локалната самоуправа и медиумското известување за локалната култура за периодот април-јуни 2026 година ќе биде презентиран денеска во КСП Центар-Јадро во Скопје.
Настанот што е во организација на Јадро – Асоцијацијата на независната културна сцена, во соработка со Институтот за медиуми и аналитика (ИМА) ќе ги претстави резултатите од истражувањето што ја анализира јавната комуникација на Министерството за култура и туризам, Град Скопје и општините Тетово, Струга, Битола, Кавадарци и Струмица, како и известувањето на онлајн медиумите за локалната култура.
Мониторингот се однесува на периодот од 1 април до 30 јуни 2026 година и ги разгледува начините на кои институциите ги комуницираат културните програми, фестивалите и манифестациите преку официјалните веб-страници и социјалните мрежи, како и застапеноста на темите од областа на културата во медиумските содржини.
Резултатите од истражувањето ќе ги презентираат авторите Мила Стаменова Бурнс и Петрит Сарачини од ИМА, додека координаторот на проектот, Дарко Алексовски од Јадро, ќе даде осврт на проектните активности и цели.
