На погребната миса посветена на Неговата светост, папата Франциск, присуствуваше и македонската претседателка, Гордана Сиљановска-Давкова.
Пред околу 200.000 верници и почитувачи на папата, како и бројни религиозни лидери, претставници на кралски семејства, шефови на држави, премиери и државни делегации, се одржаа црковни церемонии. Изразувајќи длабока жалост и искрено сочувство по повод неговата смрт, претседателката Сиљановска-Давкова во телеграмата испратена до Ватикан ја истакна неговата импресивна и инспиративна личност, која беше совршена хармонија помеѓу зборовите и делата. Таа му оддаде признание за огромното влијание што го имаше како заклет миротворец, хуманист, застапник на меѓурелигискиот дијалог и помирувањето.
Во возвишена атмосфера и света миса, водена од кардиналот Џовани Батиста Ре, присутните беа исполнети со аплаузи и солзи додека го испраќаа саканиот папа во неговиот вечен дом, базиликата Санта Марија Маџоре. За разлика од претходните папи кои се погребани во криптата на базиликата Свети Петар, папата Франциск остави аманет да биде погребан во Санта Марија Маџоре, една од „петте папски базилики“. Во таа базилика, во 2015 година, беше поставена плоча на македонски јазик во чест на Светите браќа Кирил и Методиј.
Минатата година, претседателката Сиљановска-Давкова имаше аудиенција кај папата Франциск, која ја оцени како незаборавен настан, благодарение на мудрите папски мисли за најважните светски прашања и неговиот респект кон македонската традиција на толеранција на различностите. Папата Франциск, исто така, ја потврди важната улога на религијата во развојот на општествената хармонија. Тој беше првиот поглавар на Римокатоличката црква кој ја посети Македонија. За време на историската посета во 2019 година, папата изјави: „Македонија е портата преку која христијанството влезе во Европа, бидејќи жителите на македонското тло се првите Европејци на кои апостолот Павле им го пренел Христовото учење“.
