39 години казна затвор за големата сообраќајна несреќа кај Ласкарци во која животот го изгубија 16 луѓе а 30-тина се здобија со тешки и трајни повреди. Возачот кој ја држел линијата Скопје -Гостивар Маноил Трифуновски доби највисока казна бидејќи иако знаел дека автобусот не е исправен качил 55 патници на кобниот ден 13 февруари 2019-та. Ја прекорачил и брзината па наместо со 80 возел со 99 на час кога ја изгубил контролата врз возилото и ги довел во опасности животите на патниците.
Сопственикот на „Дурмо турс“ Дурмиш Белули доби 4 години затворска казна бидејќи иако знаел дека не смее, раководењето со возниот парк го препуштил на Ремзи Мифтари, кој немал соодветно образование и сертификати за работа за што доби 6 години затвор.
- Говори Диана Груевска Илиевска: „Продолжил да се лизга по левата страна од автобусот преку коловозот и преминал на земјина и тревна површина од нива каде се превртел на покривот и застанал поради што настапила смрт на 16 лица “.
Игор Ѓорѓиевски, Горан Дуковски и Јане Боварски, се осудени на по пет години затворска казна бидејќи дале зелено светло автобусот да вози патници наместо да го известат МВР дека е неисправен и кочниците не се целосно исправни.
- Говори Диана Груевска Илиевска: „Обвинетиот Игор Ѓорѓиевски и Горан Дуковски овозможиле на превозникот „Дурмо турс“ да користи технички неисправен автобус кои неисправности Дурмил Белули и Ремзи Мифтари не ги поправиле и отстраниле, и дозволиле во сообраќајот на јавните патишта да учествува во сообраќајот на јавните патишта“.
За семејствата на жртвите казните се недоволни бидејќи 13-ти февруари останува црн ден за Гостивар.
- „Како да бидеме задоволни, особено кон прво обвинетите, сметаме дека казните се минимални, ова беше најтешката несреќа во историјата на постоењето на Гостивар,“ изјави татко на еден од загинатите.
- „Нашите очекувања беа дека казните нема да се движат поблиску до законскиот минимум на казнување за ова кривично дело кое што може да се движи во распон од четири до 20 години. Во тој поглед секако дека ќе се преиспита казната и битна алка во одговорноста е одговорното лице и се надевам дека во иднина никогаш нема да бидеме сведоци на ваква трагедија“, рече Јакимовски.
За сите обвинети судот изрече забрана за вршење на дејноста во период од пет години.
