Дали навистина се водат преговори меѓу Иран и САД или се тоа сепак само шпекулации? Американскиот претседател Доналд Трамп вели дека војната со Иран била добиена и дека Техеран сакал да преговара. Од Иран демантираат.
„Мразам да го кажам ова, но ги убивме сите нивни лидери. Потоа се состанаа за да изберат нови лидери и ги убивме сите таму. И сега имаме нова група, лесно можеме и со нив исто да направиме. Но, да видиме како ќе се покажат. Всушност, имаме промена на режимот. Знаете, ова е промена на режимот, бидејќи лидерите се многу различни од оние со кои почнавме, што ги создадоа сите проблеми“, изјави Доналд Трамп, претседател на САД“, изјави Доналд Трамп.
Официјален Техеран, пак, со демант вели дека Вашингтон си преговара сам со себе.
„Дали вашите внатрешни конфликти стигнаа до точка каде што преговарате сами со себе? Нашиот прв и последен збор е ист од првиот ден и ќе остане таков: некој како нас никогаш нема да постигне договор со некој како вас. Ниту сега, ниту кога било“, велат од иранското МО.
На терен, ситуацијата останува иста, со секојдневни меѓусебни напади.
Израелската армија денеска ги гаѓаше инфраструктурните делови во Техеран, при што бил погоден станбен објект. Иран возврати со напади кон Израел и земјите од регионот. Кувајт пријави дека бил погоден аеродромот во главниот град, но за среќа – без жртви.
И покрај дилемите околу тоа дали воопшто има преговори на релација САД – Иран, изјавите на Трамп ги смирија пазарите. Цената на нафтата се намали за 4 проценти и денеска таа повторно е во границата до 100 долари. Барел нафта се продава за 98 долари.
Мартин Трајчевски
