Преголемата партизација на општеството фрла сомнеж за наместени тендери. Бенефит од тоа имаат не само поединци, туку и политички партии. Ова е реакцијата на дел од аналитичарите откако анализата на Центарот за граѓански комуникации покажа дека за пет години, десет исти фирми свртеле 1 милијарда евра државни пари. Во мала држава како Македонија, велат тие, не е тешко кога си близок со некој на власт да дознаеш какви се условите, па дури и да ги наместиш за да фаворизираш една фирма да добие милионски тендер. Оваа пракса не е од сега, туку трае со децении. Огромен простор за корупција, особено фрла случајот со Марковски Компани која со години ги добива тендерите за ископ на јаглен во РЕК Битола, без притоа раководните органи да се потрудат да набават сопствена механизација за да заштедат на трошоци.
Особено симптоматично, за аналитичарите е тоа што јавното обвинителство отвора случаи, но без никаков епилог. Кога би имало казни, велат тие, би имало и позитивни ефекти.
Нелојална конкуренција има и кога фирмите се договараат меѓу себе кога учествуваат и даваат понуди на тендерите. Дел од нив се обесхрабруваат и воопшто да изнесат своја понуда, ако имаат интерни информации дека јавниот повик е однапред наместен и фаворизира некоја фирма преку определување специфични услови во тендерската документација.
Истражувањето открива дека договорите за јавни набавки кои се склучени во претходните 5 години, достигнуваат вкупно 5,8 милијарди евра, а една третина од нив, или над две милијарди евра добиле 50 фирми. Меѓу првите 10 фирми се „Марковски компани Битола“, „Д-р Пановски“, „Пуцко Петрол“, „Енерџи Деливери Солушнс“, „Илинден Струга“…
