Камбаните одекнаа насекаде носејќи ја веста за Христосовото Воскресение. Праволавните христијани ги преполнија храмовите и илјадници граѓани со радост ја одбележаа Христовата победа над смртта. Традиционално, Соборниот храм и утрината го исполнија верници за велигденската богослужба. Во духот на празникот, свештениците испратија пораки за вера, надеж и љубов.
„Воскресението е темелорт на нашата вера, сила на наша надеж, смртта не е крај, туку е премин на живот кон бога, извор на љубов, преку него учиме да љубиме.“– вели г.г. Стефан, Поглаварот на Македонската православна црква – Охридска архиепископија.
„Да го чуваме споменот за нашите достојни претчественици за нашата татковина и црква, нека ни бидат и порака да ги сочуваме придобивките кој ни ги оставиле и да ги надградуваме со нови плодови.“– порача Отец Сашо.
Граѓаните утринава запалија свеќи за здравје, среќа, бериќет и мир и оставија по едно вапсано црвено јајце на иконите. По завршувањето на 48-дневниот пост, денеска ќе седнат на празнична трпеза, споделувајќи ја радоста со своите најблиски.
„Тоа е ново раѓање, нов почеток. Надеж за подобро утре, здравје и среќа. Ова е најголем христијански празник. Ќе го славам со најблиските на велигденска трпеза, ќе има месо и од се по нешто. Им порачувам на сите да се сакаме и политуваме и да си помагаме безусловно.“– велат граѓаните.
Велигден, како најголем христијански празник, го одбележува денот кога Исус Христос ја потврдил својата божественост преку воскреснувањето од мртвите. Христовото воскресение претставува надеж и ветување за вечен живот, и е најзначајниот настан врз кој се темели верата на православните христијани. Празнувањето на Велигден трае три дена, а верниците меѓусебно се поздравуваат со „Христос Воскресе“ и одговараат „Навистина Воскресе“, се до празникот Св. Спас.
