Обилните врнежи од дожд предизвикаа локални поплави и излевања на реки во неколку региони низ земјава, но според надлежните, состојбата во најголем дел е стабилна. Најпогодени се делови од Пелагонискиот и Југозападниот регион, каде се поплавени ниви и куќи, а во Кичево сè евакуираа луѓе. Во останатите региони нема поголеми нарушувања, а институциите продолжуваат со теренски интервенции и апелираат на внимателност. Од Цук интервенирале во критичните делови од Пелагонија.
Невреме со интензивни врнежи од дожд предизвика сериозни проблеми и во Полошкиот регион. Поради зголемениот водостој, неколку реки се излеаја, при што беа поплавени земјоделски површини и делови од населени места. Штетите се значителни, а на повеќе локации движењето се одвивало отежнато.
Од Центарот за управување со кризи соопштуваат дека на подрачјето на Тетово се пријавени уривања на потпорни ѕидови и излевања на помали водотеци. Надлежните служби се на терен и вршат увид, додека општинската механизација работи на расчистување на свлечиштата.
И во Гостиварско дождовите предизвикаа поплави на локални патишта и во одредени населени места. Јавното претпријатие „Комуналец“ и механизацијата на Водостопанство се ангажирани за санирање на штетите и нормализирање на состојбата.
Силните дождови направија хаос во речиси секој дел од Македонија. Прелевањето на реките придонесе за поплавување на земјоделски земјишта, дворови, куќи и магацини. Најкритично беше во Ресен, Кичево, Охрид и Пелагонискиот регион, а евакуирани се околу 120 луѓе. Екипите на Центарот за управување со кризи на терен ги чистеа каналите и речните корита, a на терен излегоа и полициски службеници како и од Дирекцијата за заштита и спасување. Со помош на пумпи се вадела водата од куќите во ресенско, а граѓаните биле заглавени со возила во излеаните води. И покрај лошите времнски услови, сепак сите патишта се проодни и никаде нема застои. Вицепремиерот и министерот за транспорт Александар Николоски посочи дека активно се расчистуваат два клучни патни правци – кон Косоврасти и кон Маврово, каде што механизацијата постојано е на терен.
Надлежните се на готовс бидејќи за утре претпладне најавени се нови врнежи од врнежи од дожд и снег. Стабилизација и суво време метеоролозите најавуваат дури од вторник.
