Идните бруцоши ги прават првите чекори кон факултетските амфитеатри. Почнува првиот уписен рок на Универзитетот ,,Св Кирил и Методиј”, каде за новата академска година на 23 факултети има 8851 слободно место, од кои 4395 за редовни студенти, 3621 со кофинансирање и 835 вонредни студенти. Од право, економија и психологија, до електротехника и машинство, идните студенти веќе имаат одговор каде ја гледаат својата иднина.
Најмногу слободни места има на Медицинскиот факултет, 950, на ФЕИТ и Машинскиот факултет по 600 места, додека на Правниот факултет се предвидени 555 места. Иако можностите за понатамошно вработување се нераскинлива алка од изборот на професија, се чини дека матурантите при изборот не се водени од материјални побуди, туку пресудни се љубовта и личниот интерес за областа за која се определиле.
Покрај УКИМ, во август уписи за новата академска година се спроведуваат и на останатите државни универзитети. На Универзитетот ,,Гоце Делчев” во Штип е предвидено вкупно 3341 место за бруцоши, а на универзитетите во Битола, Тетово и на ,,Мајка Терезa” во Скопје, заедно има повеќе од 6000 слободни места. Идните студенти имаат можност да избираат меѓу бројни студиски насоки и програми.