Денес, заедно со градоначалникот на општина Кисела Вода, Орце Ѓорѓиевски, и градоначалникот на општина Аеродром, Дејан Митески, извршивме увид во градежните активности за санација на дел од регионалниот пат Р1106, делница Драчево-Долно Лисиче, објави Коце Трајановски, директор на Јавно претпријатие за државни патишта.
Продолжуваме со активности насочени кон подобрување на патната инфраструктура во и околу населените места, каде што е неопходна итна санација на коловозот. Една од тие санации е потребна на регионалниот пат R1106, односно на делницата од Драчево до Долно Лисиче, потенцираше директорот на ЈПДП, Трајановски.
Тој додаде дека на оваа делница, која има променлива ширина од 5,5 до 6 метри, е потребна изработка на тампонски слоеви, подигнување на шахти, асфалтирање и други придружни градежни активности, кои веќе се отпочнати.
Дополнително, ЈПДП ќе започне со постапка за проектирање на овој регионален патен правец Драчево – Долно Лисиче – Јурумлери со цел зголемување на безбедноста во сообраќајот за сите учесници, објави Трајановски на својот фејсбук профил.
