Во ООУ „Св. Климент Охридски“ во село Драчево почна практичната работа со учениците во рамки на проектот „Star for Life“ чија мисија е превенција и целосно искоренување на врсничкото насилство преку едуцирање на младите за навремено препознавање на ризични ситуации, правилно реагирање и создавање пријателска училишна атмосфера.
Стручни експерти почнуваат со континуирана работа со учениците. Откако беше потпишан трипартитен меморандум за соработка помеѓу Општината Кисела Вода, училиштето и Обединета македонска дијаспора (ОМД) – Подружница Македонија, и се реализираа обуките за наставниците, фокусот се префрла на директна работа со децата.
На настанот присуствуваше градоначалничката на Општина Кисела Вода, Бети Стаменкоска – Трајкоска, а поддршка на овој процес, како што наведува Општината во соопштение, дадоа и глобалниот генерален секретар на „Star for Life“, Џесика Грундстром Алдин, донаторите на проектот Антонијо Трпевски и Пирко Трпевски, претставниците од тимовите на „Star for Life“ и „Motivation Lift“, како и претставниците од ОМД.
Општина Кисела Вода соопшти дека „останува силно посветена на обезбедувањето здрава, безбедна и стимулативна средина за секое дете“.
Градоначалничката Бети Стаменкоска-Трајкоска изјави дека имаат јасна мисија – превенција и искоренување на врсничкото насилство.
-Сакаме секое дете во Општина Кисела Вода да доаѓа на училиште без страв, да се чувствува безбедно, прифатено и заштитено. Преку овој проект, нашите ученици ќе научат како навреме да го препознаат булингот, како правилно да реагираат и како да си бидат искрена поддршка едни на други. Упатувам огромна благодарност до шведскиот амбасадор Ола Сулстром, кој е поддржувач на овој проект, до глобалниот генерален секретар на „Star for Life“, Џесика Грундстром Алдин, до донаторите Антонијо и Пирко Трпевски, кои ја овозможија оваа иницијатива, како и до нашите партнери од ОМД и експертските тимови на „Star for Life“ и „Motivation Lift“. Оваа заедничка цел за градење поздрава и побезбедна училишна средина можеме да ја оствариме само преку меѓусебна соработка и посветеност, истакна градоначалничката Стаменкоска-Трајкоска.
