Почна асфалтирањето на новите јавни паркинзи во Дебар, кои се наоѓаат во близина на Центарот за култура и спортската сала „Дибра“.
На увид на работите беше градоначалникот Фисник Меља, кој изјави дека работите се одвиваат со брзо темпо и наскоро граѓаните ќе имаат на располагање нови и пофункционални паркинг-простори, што ќе создаде подобри услови за граѓаните и посетителите.
– Станува збор за над 300 паркинг места, кои се наоѓаат во близина на центарот на градот. Нивното ставање во функција ќе помогне во надминувањето на проблемот со недостигот на паркинг места. Работите напредуваат со брзо темпо и наскоро граѓаните ќе имаат на располагање нови и функционални паркинзи, рече градоначалникот Меља.
Додаде дека вкупната вредност на проектот е 16. 215.470 денари а инвеститор е самата општина, додавајќи дека како локална власт продолжуваст со реализација на конкретни проекти за поуреден и пофункционален град.
Во меѓувреме, како што потврди за МИА, директорот Генц Садику, во координација со градоначалникот Меља, дворот и спортскиот терен на Основното општинско училиште „Пенестија“ веќе се пренаменети во паркиралиште, со цел да се намали сообраќајниот метеж, поради доаѓањето на иселениците и зголемувањето на бројот на возила.
Садику дообјасни дека влезот е од задната страна на училишната зграда а просторот може да се користи 24 часа, се до 25 август кога иселениците се враќаат во земјите каде што живеат.
