Со БРТ системот или таканареченото „Метро на тркала“, скопјани очекуваат да добијат побрз, посигурен и предвидлив јавен превоз. Проектот ќе се реализира преку градот Скопје и истовремено треба да го реши и растовари сообраќајниот метеж и хаос на градските улици и да го намали загадувањето. За скопјани ова е проект со кој се решава децениски проблем, а долгите чекања со часови на автобуските постојки и доцнења кој на училиште, кој на работа, кој на лекар, конечно ќе станат минато.
Целиот проект Владата најави дека ќе биде завршен во февруари 2029 година, а за таа намена се обезбеди заем во висина од 70 милиони евра. Средствата се обезбедени од Европската банка за обнова и развој, а Владата ќе ги трансферира како неповратни за Градот Скопје. Проектот предвидува изградба на две линии во Скопје, едната Исток – Запад која ќе се движи од Ѓорче Петров до Ново Лисиче и втората Север – Југ која треба да ги поврзе Бутел и Кисела Вода. Потоа набавка на хибридни нископодни БРТ-возила, патнички информативен систем, паметни станици, како и интеграција во системот на управување со сообраќајот во градот. Градоначалникот Ѓорѓиевски објасни дека трасата нема да поминува низ зеленилото по средината на сообраќајните ленти и дека ќе се заштитат сите важни природни ресурси, вклучително и водоснабдувањето на градот.
Наместо тоа системот ќе се движи по крајните сообраќајни ленти, а дополнително ќе се предвиди и ново зеленило како природна бариера. БРТ системот се очекува да овозможи превоз на над 65.000 патници дневно. Градот Скопје најави дека годинава ќе стигнат и нови еколошки автобуси и со тоа градот ќе добие јавен превоз како во европските метрополи, без застои и загадување и достапен за сите.
