По дебаклот на изборите и оставките во СДСМ, Филипче ќе прави кадровски промени. Кандидатот за градоначалник но оштина Аеродром, Александар Трајановски, ќе биде нов потпретседател на партијата. Според партискиот лидер тој е правиот избор за оваа функција, образложувајќи дека Трајановски е исклучително посветен на партијата и имал одлична кампања на изборите. Останатите кадровски и политички промени во СДСМ ќе бидат соопштени вечерва на Извршниот одбор.
По јавните превирања и критики, Филипче тврди дека во СДСМ нема раскол. Во прозивските од Фрчковски и Пендаровски не гледа ништо спорно, напротив вели помагале во процесот.
-Тоа што излегува на социјалните мрежи, го демантирам. Нема никакво раслојување. Навистина има единство со сите луѓе и овие што ги спомнавте. Сите помагаат во процесот како што беше и претходно. Во тој манир ќе продолжиме и понатаму, рече Филипче.
Инаку, Александар Трајановски беше кандидат на СДСМ за градоначалник на општина Аеродром, и во двата изборни круга ја изгуби битката за прв човек на општината. Тој е специјализиран ортопед и трауматолог, поранешен директор на Универзитетската клиника за трауматологија.
Оваа промена доаѓа по оставката на потпретседателката на СДСМ, Ана Чупеска, која беше поднесена во очи на вториот круг од локалните избори.
