Прв пат по седум години еден министер за надворешни работи го свикува амбасадорскиот совет, еден од најважните механизми за стратешка координација на македонската дипломатија. Во време на длабоки геополитички промени, растечки безбедносни предизвици и сè покомплексни меѓународни односи, македонската дипломатија не смее да биде пасивна туку проактивно да ја бара најдобрата солуција за државата.
–Ова е првпат по 2019 година Амбасадорскиот совет повторно да се одржи во нашата држава, со физичко присуство на шефовите на дипломатско-конзуларните претставништва. По повеќе години, нашата дипломатска мрежа повторно ја собираме на едно место за директна, суштинска и стратешка координација. Амбасадорскиот совет е еден од најважните механизми за стратешка координација на македонската дипломатија. Целта е јасна: да направиме пресек на сработеното, да ги усогласиме позициите и, пред сè, да поставиме конкретни задачи за периодот што следува – изјави Тимчо Муцунски, министер за надворешни работи.
На состанокот ќе се разговара за европската и евроатлантската агенда, геополитичките и безбедносните промени, регионалната стабилност, институционалната отпорност, економската дипломатија и конзуларното работење. Министерот тимчо Муцунски нагласи дека нема само да се анализира што се случува во свето, туку ќе се утврдува што тие промени значат за нашата држава.
– Потребна ни е дипломатија која предвидува. Која реагира навремено. Која гради партнерства. И која одлучно ги штити националните интереси – додаде Муцунски.
Министерот истакна и дека еден од главните фокуси на годинашниот Совет ќе биде економската дипломатија, со јасна порака до амбасадорите дека секој амбасадор мора да биде и економски промотор на нашата држава.
На Советот на амбасадори ќе присуствува и заменик-претседателот и министер за надворешни работи на Република Чешка, Петр Мацинка, со кого ќе се разговара за продлабочување на билатералните односи, европската перспектива, економската соработка и актуелните регионални и меѓународни прашања.