– Петти национален конгрес по оториноларингологија и хирургија на глава и врат со меѓународно учество почнува денеска во Скопје и ќе трае до 14 ноември.
Реномирани професори, лекари и експерти од САД, Турција, Србија, Бугарија, Хрватска, Албанија и Црна Гора, заедно со истакнати специјалисти и универзитетски професори од државава ќе имаат можност за размена на знаења и искуства, како и за идни заеднички проекти, професионална соработка и дополнителна едукација. Во рамки на когресот ќе се одржат предавања, стручни дискусии, тематски сесии, симпозиуми и презентации на научни трудови. Програмата опфаќа широк спектар современи теми: заболувања и хирургија на уво, аудиологија и кохлеарна имплантација, ринологија и алергологија, ларингологија, хирургија на глава и врат, заболувања на тироидната жлезда, како и нарушувања на спиењето поврзани со нашата специјалност.
Ќе се разговара за нови дијагностички пристапи, современи оперативни техники, сложени клинички случаи и можностите научните сознанија да се применат во секојдневната клиничка практика, информираат од Универзитетската клиника за уво, нос и грло, која е организатор на конгресот.
Значајно место во конгресната програма, како што се посочува, имаат и младите лекари, специјализантите и истражувачите.
Преку нивните презентации и непосредниот контакт со искусни експерти, сакаме да ја поттикнеме следната генерација оториноларинголози да истражува, да поставува прашања и активно да учествува во развојот на нашата струка. Нашата заедничка цел е унапредување на квалитетот на дијагностиката и лекувањето, во чекор со современите меѓународни стандарди. Со конгресот испраќаме јасна порака дека македонската оториноларингологија има капацитет да биде активен дел од меѓународната научна и професионална заедница, наведуваат од Клиниката за уво, нос и грло.
