Петмина јавни обвинители досега поднеле кандидатури на огласот за избор на основен јавен обвинител на Основното јавно обвинителство за гонење на организиран криминал и корупција (ОЈО ГОКК), потврди претседателот на Советот на јавните обвинители, Башким Бесими.
Според информациите за функцијата се кандидирани вишиот јавен обвинител Јове Цветановски, поранешниот обвинител во СЈО, а сега обвинител во Вишото јавно обвинителство, Трајче Пеливанов, обвинителката од ОЈО Скопје Лидија Раичевиќ, како и обвинителите од ОЈО ГОКК Искра Хаџи-Василева и Фатон Азизи.
На прашањето дали ова е конечната листа на кандидати, Бесими изјави дека засега се пријавени овие петмина обвинители.
– Сега за сега се тие, после празникот ќе биде официјално – изјави Башким Бесими.
Советот на јавните обвинители за в петок има закажано седница на која, меѓу другото, треба да бидат формирани комисии поврзани со постапката за избор на нов шеф на ОЈО ГОКК. Согласно одлуката за свикување на 50-та седница, на дневен ред е формирање Комисија за подготвување на кандидатски листи, како и Комисија за избор на основен јавен обвинител на ОЈО ГОКК.
Огласот за избор на раководител на ОЈО ГОКК беше објавен од Советот на јавните обвинители врз основа на Законот за Советот на јавните обвинители и Законот за Јавното обвинителство. Според огласот, изборот на основен јавен обвинител на ОЈО ГОКК ќе се спроведе на 28 октомври 2026 година, во периодот од 8 до 16 часот.
Право на кандидатура имаат јавни обвинители со најмалку шест години непрекинат стаж како јавен обвинител до моментот на пријавувањето и со позитивна оценка во последните три години.
Изборот на нов шеф на ОЈО ГОКК следува по истекот на мандатот на актуелниот раководител Ислам Абази, кој функцијата ја извршува од октомври 2022 година.
