Министерот за локална самоуправа Златко Перински на денешната прес-конференција изјави дека сè уште нема официјална информација за тоа кој ќе биде кандидатот на ВМРО-ДПМНЕ за градоначалник на Скопје, но нагласи дека без разлика на изборот, кандидатот ќе ја има неговата целосна поддршка.
Актуелниот градоначалник на Кисела Вода, Орце Ѓорѓиевски, е најсериозниот кандидат на ВМРО-ДПМНЕ за Скопје, врз основа на внатрепартиска анкета. Перински, кој исто така долго време важеше за сериозен кандидат за оваа позиција, вели дека фокусот му бил насочен кон работата во ресорот, а не кон лична кандидатура.
Оваа информација сè уште ја немам, најдобро е да почекаме до недела. Точно е, во 12:30 има состанок на Извршниот комитет и очекувано е, меѓу другите имиња, да се соопшти и кандидатот за градоначалник на Град Скопје. Не само за Орце, за кој било кандидат поддржан од партијата тоа е огромна чест и ќе ја има мојата целосна поддршка. Јас навистина дадов сè од себе во делот на она што можам да го направам од овој ресор, но фокусот не беше на кандидатура за потенцијален кандидат. Тоа е принципот по кој јас работам, изјави Перински одговарајќи на новинарско прашање дали би го поддржал Ѓорѓиевски, ако биде избран за кандидат.
На прашањето дали очекува победа на ВМРО-ДПМНЕ на претстојните избори, Перински посочи на бројките што ги покажуваат анкетите.
Нашите очекувања за победа на изборите се големи и се базирани на бројки. Можам да кажам дека според анкетите ќе има историски позитивни резултати во корист на ВМРО-ДПМНЕ. Можеби во секоја општина имаме шанса да победиме, вклучувајќи го и Град Скопје, истакна министерот.
За Општина Центар, како што додаде, се очекува во наредните денови да се затвори процесот на избор на кандидат, по што ќе следува официјална потврда од партијата.
