Општина Куманово распиша два јавни повика за финансиска поддршка на здруженија кои ќе реализираат превентивни активности во областа на социјалната, детската и здравствената заштита. За овие намени од општинскиот буџет се обезбедени вкупно 650.000 денари.
Првиот јавен повик за реализација на социјална, детска и здравствена заштита се однесува на финансиска поддршка за организирање превентивни мерки и активности од областа на социјалната и детската заштита. Согласно Програмата за развој на социјалната заштита на Општина Куманово за 2026 година, предвидени се активности за намалување на социјалните ризици и социјалната исклученост преку организирање кампањи, трибини, работилници, проекти, фокус групи и изработка на промотивен и превентивен материјал. За оваа намена од буџетот на Општина Куманово се обезбедени 500.000 денари, а максималниот износ по апликација изнесува до 100.000 денари. Право на учество имаат здруженија регистрирани во Централниот регистар со седиште во Куманово, кои имаат програма за работа за 2026 година и најмалку една година активно работење и реализирани активности од областа на социјалната и детската заштита.
Вториот јавен повик е за финансиска поддршка на превентивно-промотивни активности за унапредување на здравствената заштита. Повикот опфаќа активности за промоција на здрав начин на живот, превенција на болести, поддршка на лица со попреченост, како и намалување на социо-здравствени ризици преку едукативни и превентивни кампањи. За реализација на овие активности се обезбедени 150.000 денари, а максималниот износ по апликација е до 50.000 денари.
На двата јавни повика, здруженијата можат да поднесат само еден предлог-проект. Потребната документација и апликационите формулари се достапни на веб-страницата на Општина Куманово. Рокот за поднесување на апликациите е 15 дена од денот на објавувањето на повиците, односно од денеска, 26 мај до 9 јуни 2026 година. Апликациите треба се доставуваат во писмена форма до општинската архива или по пошта со соодветна назнака до надлежното одделение.
