На предлог на градоначалникот Дарко Костовски, Советот на општина Бутел одржа вонредна седница. Седницата започна со едноминутно молчење, во знак на почит за жртвите од трагичниот пожар во Кочани. Советниците едногласно донесоа одлука за доделување на 1.000.000 денари како финансиска помош за семејствата на настраданите во несреќата во Кочани, информираат од општината.
„Македонија е во тага и секој од нас доживува огромен бол за изгубените 59 млади животи. Моите молитви се со семејствата на починатите и со повредените, да се опорават што побрзо. Ова е голема трагедија, која не можам да ја опишам со зборови. Во овие моменти потребни се солидарност, сплотеност и одговорност. Кочани 16.03.2025 – Никогаш и никаде да не се повтори!“, изјави градоначалникот Дарко Костовски.
