Премиерот Мицкоски не поседува личен имот ниту во Хрватска, ниту во Црна Гора. Откако медиумите го фатија на дело лидерот на СДСМ, Венко Филипче, како летува на скапа и луксузна јахта со екс-лидерот Зоран Заев, медиумите блиски до опозицијата и нивни поддржувачи на социјалните мрежи се обидоа со невистинити информации и лажни вести да направат паралела со премиерот, наведувајќи дека и тој летувал во луксузна вила во негова сопственост. Вистината е дека премиерот Мицкоски нема купено, нема наследено, ниту на било кој начин располага со недвижен имот во овие држави – ниту тој, ниту било кој член на неговото потесно семејство.
Фотографиите и локациите што се користат, со цел да се изманипулира јавноста, се злоупотребени. Објавените фотографии се од објекти кои се во сопственост на сосема други правни и физички лица или на државни институции на Хрватска, и тоа е лесно проверливо со јавно достапните имотни книги и катастарски податоци. Вилата за која велат дека е на македонскиот премиер, прво била во сопственост на град Загреб, а сега се наоѓа во сопственост на државна институција во Хрватска.
„Со цел да се заштити интегритетот и угледот на премиерот, ќе бидат покренати постапки пред надлежните судови против сите портали и лица кои учествуваат во ширење на овие клевети, како и кривични пријави за навреда и клевета согласно Законот за граѓанска одговорност за навреда и клевета“, велат од ВМРО-ДПМНЕ.
