ООУ „Блаже Конески“ денеска беше домаќин на презентација на средните стручни училишта во Аеродром и место каде што знаењето, талентите и занаетите се споија во една инспиративна и едукативна атмосфера. Како што соопшти Општина Аеродром, во соработка со Занаетчиската комора и со средните стручни училишта на Град Скопје, учениците имаа можност одблиску да се запознаат со различни струки, професии и можности за продолжување на своето образование.
На настанот присуствуваше и градоначалникот на Општина Аеродром, Дејан Митески, кој ја истакна важноста од навремено препознавање и поттикнување на детските таленти, интереси и способности.
-Секое дете носи посебен потенцијал и токму затоа наша обврска како општество е да им помогнеме навреме да го пронајдат својот пат. Занаетите имаат огромна вредност и значење, а вложувањето во младите е најважната инвестиција за иднината, истакна Митески.
Учениците на настанот покажале голем интерес за различните образовни насоки и професии, а ваквите средби претставуваат значајна поддршка во нивниот избор за понатамошно образование и професионален развој.
-Општина Аеродром останува посветена на создавање можности за младите, поддршка на нивните таленти и поттикнување на квалитетно образование. Учениците од Аеродром со своите успеси, освоени награди и интереси во различни области секојдневно потврдуваат дека се нашата најголема гордост и надеж за подобра иднина, стои во соопштението од Општината.
