Околу 300 нови паркинг места се планираат во централното градско подрачје на Штип, најави директорот на ЈП „Стипион“, Панче Стефановски. Тој вели дека планирани се изградба на платформи на реката Отиња, но и катни гаражи.
– Во тек е изработка на техничка и проектна документација за изградба на катна гаража, спроти хотелот „Гарни“, на ова место се очекува да имаме од 70 до 80 нови паркинзи, а исто така ќе се гради катна гаража и позади зградата на Општината. Платформа за паркирање е планирана да се изгради и кај зградата на Стопанска банка, вели Стефановски.
Тој најави дека ќе се чистат и паркинзите во центарот на градот од стари возила, кои подолго време се паркирани и претставуваат дополнителен проблем да се најде слободно паркинг место во централното градско подрачје.
– Треба да се пријавува кај комуналната служба, комунален инспектор врши увид на терен, врши проценка и му издава опомена на сопственикот на возилото со временски рок за да го отстрани. Ако овој рок не се почитува комуналните служби издаваат решение до ЈП „Стипион“ кои имаат обврска да го отстранат возилото – вели Стефановски.
Освен за хаварисани возила санкции ќе има и за неправилно паркирано автомобили, оставени на тротоари и коловози. Целта е полесно да се најде слободно паркинг место во централното градско подрачје.