Загрозување на сигурноста при семејно насилство и по пат на информатички систем како и непочитување судска наредба се трите кривични дела кои скопското обвинителство му ги става на товар на заканувачот Емил Јакимовски, поранешен вработен во Централниот регистар. За сите дела поединечно предвидени се високи затворски казни. За обвинителството постои основ Јакимовски да заврши во притвор поради опасност од бегство, повторување на делото и влијание врз сведоци.
Тој беше уапсен вчера, по серијата вербални напади и деноноќно вознемирување на новинарките Искра Коровешовска и Мери Јордановска, но и на други лица. По 20 часа помина на распит во полициска станица, судија на претходна постапка одлучи по барањето на обвинителството кое бараше Јакимовски да оди во Шутка.
Основ повеќе за притворот на Јакимовски е што тој веќе еднаш бил правосилно осуден за семејно насилство со условна казна дека не смее да го повтори делото во рок од 3 години, во спротивно му се заканува затвор од 1 година. Изминатиов период освен од новинарките Искра Коровешовска и Мери Јордановска, во полиција стигнале пријави и од други лица кои не биле поштедени од него. На листата жртви на Јакимовски била и директорката на Централен регистар каде тој до скоро беше вработен.
Катерина Гетева
