„Многу чад, тешко е за дишење и многу ризик. Но мораме, бидејќи селото е во прашање.“
И ноќеска битката со пожарите не стивна. Лице в лице со огнот, пожарникари и доброволци од речиси цела Македонија со часови се бореа да го сопрат неговиот налет и да го задржат подалеку од селото Чаниште во прилепско. Густиот чад, силниот ветер и непристапниот терен ја правеа борбата уште потешка. За среќа, нема жртви, а при интервенцијата, повреда на ногата заработил еден багерист.
„Жесткока битка со огнот во непосредна близина на селото Крушевица, но успеавме да го сопреме и од патот да го повлечеме скроз доле. Едниот пинцгауер остана без вода, да не беа тие ова ќе беше страшна ситуација“, изјави Стојанче Ангелов, раководител на главниот штаб за управување со кризи.
Ситуацијата е лоша но ќе ја ставиме под контрола. Верувам дека за 2 3 часа“, изјави пожарникар Бранко.
Силниот ветер во текот на ноќта, ја продолжи огнената линија кон селото Крушевица.Од утринава гаснењето продолжи и од земја и од воздух. Прво се фрлаше вода со хеликоптерот на МВР од воздух, а потоа и со трите ер-трактори. Се прават напори за спас и на селото Крушевица.
„Огнот се движи кон Крушевица. Оптимист сум дека линијата ќе ја изгаснеме. Пинцгауерите се поддршка, овој крак верувам дека ќе го изгаснеме“, изјави Стојанче Ангелов, раководител на главниот штаб за управување со кризи.
Покрај пожарот кај Чаниште, критично е и во Студеничани и Македонски Брод. Во изминатото деноноќие регистрирани се вкупно 37 пожари на отворен простор, од кои 3 се активни, 1 е под контрола, а 33 се изгаснати.
