Одложувањето на дебатата на Комисијата за надворешни работи во ЕП за извештајот за Македонија и реакциите од Бугарија ја покажаа вистината – Македонија е жртва на билатерални спорови и негирање на македонскиот идентитет и јазик сметаат експертите. Според нив, без разлика каков ќе биде финалниот исход од целата оваа епизода, јасно е дека македонската дипломатија извојува една огромна победа во големата битка. Целата јавност сега може да гледа и да суди. Единственото што е спорно е самото постоење на македонскиот идентитет, и се оспорува постоењето на македонската нација – од една членка на ЕУ, и тоа во Европскиот парламент, каде што треба да биде центарот на европската демократија.
Ова е доказ дека не само Муцунски, туку целата дипломатска мрежа била ангажирана во овој потфат – за да се покаже зошто Македонија има проблем со уцените од Бугарија и со злоупотребата на македонската евроинтеграција од страна на Бугарија. Јасно е дека нашиот одговор мора да биде „не“.
Работите излегоа на виделина – условно кажано, „конзервата се отвори“, и целиот смрдеж и гнилеж излегоа на површина, и се виде што стои зад овие барања и негирањето на нашиот идентитет од страна на Бугарија. Истовремено, ова е сигнал од Софија дека тие не се сериозни во однос на тоа како Македонија може да продолжи по патот кон ЕУ.
Секоја поддршка е важна. Европратениците гласаат според сопствено убедување, и кога станува збор за ова, се очекува поддршка од оние земји кои го поддржуваат патот на Македонија кон ЕУ, вели Ивица Боцевски, поранешен амбасадор.
Според Боцевски, во овие моменти Европејците треба да покажат подготвеност за кохезија и зацврствување на европските вредности и почитување на човековите права.
Ставките во извештајот на известителот Томас Вајц, каде се потврдува посебноста на многувековниот македонски идентитет и јазик ја разгневија Бугарија, која преку нејзините пратеници во Европскиот Парламент сакаше да издејствува со амандман „present“ или во превод сегашност – дека македонскиот идентитет се однесува само на сегашното време.
Според поранешниот амбасадор во САД, Зоран Јолевски долго време чекаме да станеме дел од Унијата,а она што и се случува на Македонија со оспорувањето на идентитетот нема никаква врска со европските вредности.
Посебноста на македонскиот идентитет не може никој да ја оспори. Одложувањето веројатно е за консултации. Ние, во меѓувреме, треба да продолжиме со реформите и нашата економија да ја приближиме до европската. Веќе 21 година имаме поднесено апликација. ЕУ, особено по конфликтот во Украина, треба да го забрза интегрирањето на регионот, вели Јолевски.
Во една засилена дипломатска офанзива на Македонија и непопуштање пред барањата од нашиот источен сосед, Бугарија како да се најде во небрано. Преку различни канали се обидува да изврши притисок да ги спроведеме уставните измени а од друга страна не го признава македонскиот идентитет и јазик. За власта единствено прифатливо е ако уставните измени бидат со одложено дејство, за да се заштитиме од дополнителни барања од источниот сосед.
