Од утре од Градско кон Прилеп ќе се вози по целосно нов експресен пат. Конкретно до Фариш, до каде комплетно е завршена втората потешка делница за изведба од овој многу значаен патен коридор за овој регион. Делот од експресниот пат низ Фаришката Клисура, кој во двете насоки има по две ленти за сообраќај, беше вистински предизвик односно најтежок за изградба – во делот на тунелите, но и во делот на косините за чија изградба беа користени посебни методи.
Официјалното пуштање на делницата Дреново–Фариш ќе биде утре напладне, со присуство и на премиерот Христијан Мицкоски.
Веста дека овој проект, на чија реализација се чекаше со години, па и децении, сепак не поминува без политизирање. Па така, СДСМ, на пример, излегоа со критики до власта дека се китела со туѓи перја, оти во нивен мандат бил изграден најголемиот дел од оваа делница.
Од ВМРО-ДПМНЕ им одговорија дека, за разлика од СДСМ, тие посветено и интензивно работеле на реализацијата не само на овој, туку и на низа други инфраструктурни капитални проекти. Од владејачката партија порачуваат дека кога СДСМ зборува за инфраструктурни проекти, граѓаните првин се сеќаваат на зурли, тапани и на чочек. Затоа велат: пуштањето во употреба на патиштата не е за чочек, туку за работа.
