Утре во Хаг започнува дводневниот НАТО самит, а сè уште нема официјална потврда од Бугарија дали на маргините на настанот ќе се одржи средба меѓу претседателката на државата, Гордана Сиљановска-Давкова, и бугарскиот премиер Росен Жељазков.
Средбата, доколку се случи, би се одвивала во сенка на дебатите во Хаг, каде што лидерите на земјите-членки, меѓу кои и американскиот претседател Доналд Трамп, ќе разговараат за зголемување на трошоците за одбрана и зајакнување на безбедноста на Алијансата.
Претседателката Сиљановска-Давкова веќе изјави дека иако е правило да се сретне со својот хомолог, не гледа проблем да разговара и со бугарскиот премиер, особено откако е потврдено дека бугарскиот претседател Румен Радев нема да присуствува на самитот.
„Важно е да се искористи секоја можност за разговор, особено кога станува збор за теми поврзани со нашите евроинтеграции“, изјави Сиљановска.
Средбата би можела да биде важен чекор кон деблокирање на бугарското вето и напредок во европската агенда на Македонија.
