🎥 Пораки за обединување – очаен обид за „будење“ на Ахмети

Преку две децении националистичка реторика и постојано ширење говор на омраза и поттикнување поделби, сега опозиционерот Али Ахмети се сети да испраќа пораки на македонски јазик, и да повика на „унитарна држава и обединетост“. Преку писмо, објавено по повод годишнината од Охридскиот рамковен договор, претставувајќи ги Албанците како жртва, Ахмети тврди дека во минатото биле и гонети за идејата за еднаквост, и сите гонења за неговите и нему блиските корупциски и криминални скандали – ги претставува како прогон на етничка основа. Според него, и тогаш и сега, зад тоа стоела истата стара политика – на поделби, дискриминација и убедување дека државата е „само на едните“.

Во средношколските години барав права за мојот народ и бев прогонет. Мене и на моите сонародници ни се спореа јазикот, знамето, правото на еднаквост, правото на постоење со логиката „Македонија на кедонците”. Јас и Албанците се залагаме за унитарна, заедничка и еднаква Македонија, ниту повторно моја ниту повторно твоја, туку секогаш наша Македонија. Сите ние што се осмелувавме да се залагаме за еднаквост нè гонеа за сепаратизам, национализам, шовинизам, а денес истиот пристап софистицирано се повторува со прогон и оцрнување за наводна корупција и криминал од истата доктрина и истите заробени умови кои ги карактеризираат граѓаните во граѓани од прв, втор, трет ред и сметаат дека државата им припаѓа само ним, порача Ахмети.

Експертите предупредуваат дека претстојните локални избори се своевиден референдум за партијата на Али Ахмети. Сепак, според нивните досегашни чекори, веќе не им остана ништо друго освен националистичката карта, со која ги чуваат клиентелистите, што им носат гласови на избори.

Додека власта најавува позитивна кампања, која ќе се заснова на проекти и идеи за подобрување на животот на граѓаните, ДУИ сака да си ги зачува гласачите со отворање на стари националистички теми. Иако во писмото зборува за соживот и за градење на заедничка држава, според експертите, тоа е само клише – кој пак ќе се сведе на подгревање на меѓуетничките тензии. Вчера и премиерот Христијан Мицкоски порача дека градоначалничките трки на есен ќе бидат избор помеѓу стариот систем што ја уназадил државата и нова перспектива за заеднички напредок. Се надева на позитивна кампања која ќе се однесува на проекти, но нема да биде изненаден ако ДУИ продолжи со реториката со која земјава ја враќа две или три децении назад.