Јавниот обвинител на Република Македонија и тимот обвинители кои ја водат истрагата за трагичниот пожар во дискотеката „Пулс“ во Кочани, денеска остварија средба со семејствата на загинатите во несреќата.
Како што соопшти Јавното обвинителство, обвинителите ги информирале блиските за досегашниот тек на истражната постапка, одговарале на нивните прашања и ги увериле дека истрагата се води темелно и сеопфатно.
„Се земаат предвид сите аспекти на евентуална одговорност за трагичниот настан. На семејствата им беше најавена и динамиката на претстојните распити на оштетените како следна фаза од истражниот процес,“ се наведува во соопштението.
Обвинителството нагласува дека продолжува со интензивни истражни дејствија, вклучувајќи распити и вештачења, чија прелиминарна анализа се очекува во наредните денови. Во истрагата се вклучени десетици експерти од различни области, со ангажирање на сите достапни капацитети на истражните органи.
Истовремено, Обвинителството упати отворен повик до сите граѓани кои располагаат со лични сведоштва, информации или докази поврзани со работењето на клубот „Пулс“ и поврзаните субјекти, да ги споделат преку специјален формулар достапен на веб-страницата на Обвинителството (www.jorm.gov.mk). Пополнетите формулари може да се испратат на електронската адреса: [email protected].
Во меѓувреме, семејствата на загинатите организираа протест пред зградата на Јавното обвинителство, повикувајќи на одговорност, оставки и формирање на експертска влада. Тие се упатија и кон Собранието, каде остварија средби со пратеници од Левица и СДСМ, како и со лидерот на опозицијата, Венко Филипче. Потоа се придвижија кон Министерството за внатрешни работи, каде беше најавена средба со министерот Панче Тошковски.
Според досегашните податоци од истрагата, во пожарот што избувна на 16 март 2025 година, за време на концерт на групата „ДНК“, загинаа 62 лица. Причина за пожарот биле искри од пиротехнички ефекти, а истрагата открила сериозни прекршувања – дискотеката работела без валидна лиценца, без адекватни противпожарни системи и со недоволен број на излези за евакуација.
До овој момент, осомничени се 68 физички и три правни лица.
Обвинителството ја потенцира својата посветеност за навремено и целосно расветлување на причините и одговорноста за најтрагичниот пожар во поновата историја на државата.
