Во Кривичниот суд почна судскиот процес против Сулејман Јамалари, обвинет за физички напад и закани кон градоначалничката на Скопје, Данела Арсовска. Тој пред судот се изјасни дека не се чувствува виновен за делото „насилство“, за кое го товари Обвинителството.
На рочиштето сведочеше Арсовска, одговарајќи на вкрстени прашања од јавниот обвинител, својата адвокатка и одбраната на Јамалари. Таа изјави дека инцидентот се случил на 18-ти месецов додека стоела под чадор на сенка, кога обвинетиот пристигнал со електричен тротинет, и се доближил со зборовите: „Што бараш ти тука?“ и ја удрил двапати во лицето. Таа, како што рече, рефлексно возвратила со нога.
Арсовска додаде дека по интервенцијата на полицијата, Јамалари 40 минути продолжил со навреди и закани, не само кон неа, туку и кон присутните градски службеници. На крај, морале да ја повикаат и интервентната полиција за да ги извлече од локацијата.
Во врска со тоа што не ја потпишала изјавата во полициска станица, Арсовска рече дека полицајците се обиделе да ѝ наметнат туѓи зборови: „При здрава свест и совест, јас на своја изјава не можам да дозволам туѓи зборови“, истакна таа.
Градоначалничката побара и обештетување од обвинетиот, а се согласи против него да се води кривична постапка. Судскиот процес продолжува, а обвинетиот во моментов издржува мерка притвор.
