Обраќање на премиерот Христијан Мицкоски на отворањето на самитот 2026 во организација на „Македонија 2025“, кој годинава се одржува со мотото „По 2025: Забрзување на растот. Поттикнување лидерство“.
На отворањето на самитот воведни обраќања ќе имаат и претседавачот на одборот на директори на „Македонија 2025“, Виктор Мизо, коосновачот на организацијата, Мајк Зафировски, и извршната директорка Никица Мојсоска-Блажевска.
Самитот обединува голем број домашни и меѓународни лидери, претставници на бизнис-заедницата, институции и експерти, а во фокусот ќе бидат економскиот раст, конкурентноста, инвестициите, инфраструктурата, дигиталната трансформација, вештачката интелигенција и улогата на дијаспората во развојот на Македонија.
Дополнително, ќе се дискутира и за лидерството, иновациите, иднината на институциите и регионалната соработка.
Синоќа, во пресрет на дводневниот традиционален самит на „Македонија 2025“, претседателката Гордана Сиљановска-Давкова организира прием на кој ги врачи признанијата за придонес на припадниците на дијаспората.
Претседателката им честита на годинешните добитници на признанието на „Македонија 2025“, д-р Ичак Калдерон-Адижес, Елизабет Наумовски и Антонијо Трпевски, потенцирајќи дека со нивната работа во науката, бизнисот, културата, филантропијата и поддршката на младите оставаат траен белег овде, но и во светот, а истовремено се и мотивација за идните генерации.
Признанието во соработка со „Македонија 2025“ се доделува на истакнати личности од дијаспората за нивниот придонес во зачувување и афирмирање на македонските историски, културни и духовни традиции и вредности, како и јакнење на националните и на државните интереси и капацитети.
