Македонија отвара истрага за „извоз на мозоци за научни цели”. По информациите дека примероци од мозочно ткиво од починати луѓе од земјата биле транспортирани во 90-тите години во САД за научно‑истражувачки цели, Јавното обвинителство оформи предмет по допрен глас. Ќе се истражува што точно се случувало, ќе се бараат информации од институциите, органите и болниците, за да утврдат дали имало незаконско работење со човечки ткива и биоматеријали. Истрагата треба да утврди дали семејствата на починатите лица дале согласност за употреба на ткивото, како и дали институциите биле запознаени и имаат одобрено ваков вид транспорт.
„Поради сериозноста на информациите, кои вклучуваат обработка, замрзнување и меѓународен транспорт на човечки ткива, како и потенцијални прашања околу усогласеноста со законските и етичките стандарди, Обвинителството ќе ги провери сите индиции за евентуално кривично дело кое се гони по службена должност“, се наведува во соопштението од Јавното обвинителство.
Истрага за “извоз на молзоци” води и Министерството за внатрешни работи во соработка со Министерството за здравство. И премиерот Мицкоски очекува истрагата на институциите да даде одговор на отворените прашања во јавноста.
Министерот Азир Алиу смета дека мали се шансите за злоупотреби.
„Лично, не како министер туку како човек, ценам дека има многу малку простор за злоупотреби. Од другата страна се САД, земја со јасно дефинирани протоколи за биолошки материјал. Значи се работи за престижен Универзитет, а научникот е човек што е светско име и лично не верувам дека може да дозволи да има злоупотреби без јасно дефинирани протоколи“,рече Алиу.
За извозот на мозоци од починати пациенти во земјава за научни цели во САД, јавноста во земјава дозна од документите поврзани со Џефри Епстин кои ги објави американското Министерство за правда каде беше спомната соработката на негова фондација со универзитетот Колумбија кој користел мозоци од увоз од, како што стои, „малата балканска земја“ Македонија.
Во колекцијата од околу 1 000 мозоци имало мозоци од луѓе што извршиле самоубиство, но и контролни примероци.
Во текстот пишува дека мозоците од Македонија биле отстранети по смртта на одредено лице, биле веднаш замрзнати, транспортирани во САД за научни цели и правилно означени и архивирани.
