Општина Аеродром ја воведува мерката за целосно ослободување од комуналии за сите млади до 35 години што го градат, го доградуваат или го надградуваат својот прв дом.
– Со оваа мерка, што се однесува за делот од комуналиите во надлежност на општина Аеродром, младите добиваат значително финансиско олеснување и силна поддршка при нивниот животен чекор кон обезбедување сопствен дом. Мерката беше донесена на првата седница на Советот на Општина Аеродром, со што јасно се потврдува определбата дека токму младите се основата на развојот на заедницата, потенцираат од локалната самоуправа.
Ова право можат да го остварат лицата што исполнуваат следниве услови:
– Лица кои имаат најмногу 35 години на денот на поднесување на барањето;
– Да се жители на Општина Аеродром најмалку (2) години;
– Градат, доградуваат или надградуваат прв дом во нивна сопственост;
– Објектот се гради исклучиво за лични станбени потреби. Заинтересираните треба да поднесат комплетна техничка документација согласно со Законот за градење, како и изјава дека објектот ќе го користат за сопствено домување најмалку десет (10) години.
Ослободувањето од комуналии се однесува на:
– Изградба на нова индивидуална куќа;
– Доградба на постоен станбен објект за индивидуално домување;
– Надградба на постоен станбен објект за индивидуално домување со која се создава прв дом.
Аеродром е општина што расте, се развива и создава простор за нови приказни, а ова решение претставува реален поттик за младите да го започнат својот животен пат тука, со сигурност и доверба во подобро утре, додаваат надлежните.
