Во последните часови од годинава што изминува, Охрид дише тивка магија, градот блеска како спомен што не се заборава. Како никогаш досега, празничниот амбиент внесува чувство на спокој и радост, како кај гостите, така и кај охриѓани. Нашиот туристички центар наликува на светска метропола, а во него уживаат, покрај домашните, и гостите од опкружувањето.
– „Слушнавме дека тука е евтино и дека има добра забава. Првпат сме овде, нè има седуммина и ќе останеме четири дена, а ќе славиме во еден ноќен клуб. До тогаш уживаме во прошетката покрај езерото и ни е убаво; Оваа убавина нема пари со кои може да се плати, Охрид е волшебен. Од Бугарија дојдовме 150 луѓе со три автобуси. Нас политиката не нè интересира, важно е да сме ние, како два различни народа, обединети; Многу е убаво, ќе прославиме буквално каде што ќе нè одведат нозете; Ние сме Италијанци, овде сме веќе три дена. Охрид пријатно нè изненади, не очекувавме олку убавина на едно место, бидејќи не знаеме многу за градот“ – велат туристите.
Ниту студеното време не ги поколеба вљубениците на Охрид да уживаат во неговите убавини. Врие шеталиштето, плоштадот и чаршијата со насмеани, ведри лица. Достоинствено и топло, градот зрачи со празнична убавина. На плоштадот сè е подготвено за најлудата ноќ, каде ќе се веселат и охриѓани.
„Во домашен амбиент, малку на плоштад, можеби и дома. Како ви се допаѓа амбиентот? Фантастичен, како и секогаш, Охрид ни е преубав. Годинава е посебно украсен, дали може да се носи со европските метрополи? Не само што може да се носи, туку мислам дека сме и на врвот“ – велат охриѓани.
Хотелско-угостителските објекти бележат 85 % исполнетост, а се работи претежно за тридневни аранжмани. Србите и Бугарите буквално го преплавија Охрид.
„Се надевам дека овие празници ќе поминат во убав ред, дека градот ќе има добра понуда и дека сите гости кои ќе го посетат градот ќе имаат убав помин во Охрид. Гостите кои го посетуваат Охрид се оние гости кои што самата понуда ги бира“ – вели Орхан Челик, туристички работник.
На гостите нема да им недостига забава. На градскиот плоштад, во преубавиот езерски амбиент, во новата 2026-та година ќе нè внесат Влатко Лозаноски, Ѓоко Танески и Ефто Пупиновски. Секој што ќе се затекне во Охрид овие празнични денови, нашите сограѓани срдечно ќе го поздрават и, од оваа убавина, и покрај сите грижи, ќе му посакаат: здравје, среќа, љубов, душевен мир и благосостојба.
