Спојување на Aгенцијата за странски инвестиции и на Дирекцијата за индустриски зони, како и поголема улога на амбасадорите во привлекувањето инвеститори. По реформирањето на Министерство за надворешни работи и надворешна трговија најава и за дополнителни мерки кои треба да ја поттикнат економијата.
Идејата е амбасадорите да станат проактивни – да ја промовираат македонската деловна клима и да привлекуваат странски инвеститори. Министерот Тимчо Муцунски вели дека амбасадите и дипломатско-конзуларните претставништва треба да ги заштитуваат македонските компании во странство ако тие се соочат со проблеми и побараат помош.
За министерот за европски прашања, Орхан Муртезани, реформите се високо на неговата агенда. Институциите треба да профункционираат како што треба за граѓаните да имаат доверба во нив. Според Муртезани загрижувачки е колку земјава не ги користи финансиите од Европската Унија кои пропаѓаат поради слабиот капацитет за аплицирање со квалитетни проекти. За таа цел ќе треба да се вработат 100 нови квалификувани лица. Во изминатите 3 години биле изгубени 123 милиони евра од европските фондови.
Сеопфатна трансформација и дигитализација на процесите е неопходна за да се формира јавен сектор од кој граѓаните ќе бидат задоволни. Целосна дигитализација ќе се постигне со промена на 140 закони, но за тоа треба време. Во моментов, има апсурдни ситуации како на пример граѓанинот да извади електронски документ, но неговата копија да не биде прифатена од некоја институција.
За само 100 дена, биле испорачани нови 80 дигитални услуги. Андоновски потенцира дека во првите 100 дена има 56% раст во користењето на постоечките услуги од страна на граѓаните.
