На површина од околу 4000илјади квадратни метри, во кругот на поранешната касaрна во Кочани, се планира да се гради новиот Дом за стари лица. Објектот ќе располага со четири ката, подпокрив и подрумски простории. Ќе биде со капацитет од околу 150кревети. Предвидени се простории за медицинска нега, рекреација и социјални активности, а ќе се користат и геотермалните води. Домот ќе биде во државна сопственост и за разлика од приватните, ќе понуди подостапни цени, со што Кочани ќе го позиционира како регионален центар за заштита на старите лица.
„Овој капитален проект е од огромна важност не само за Кочани, туку и за цела Источна Македонија. Проектиран е за згрижување на околу 150 стари лица и истиот е со голема придобивка бидејќи ќе биде во државна сопственост. Цените на услугите нама да се како сегашните кои се во приватните Домови за стари лица„ изјави градоначалникот на Кочани, Владко Грозданов.
Во меѓувреме на тендерот за изградба се пријвиле пет компании. Поради обемната документација доставена од понудувачите, електронската аукција која требаше да се одржи деновиве, е презакажана за наредната недела. До крајот на месецот се очекува да биде избрана компанијата што ќе го гради вториот државен дом за стари лица во Источниот регион.
„Се надеваме дека во текот на наредната недела ќе ја распишеме и аукцијата каде сите оние кои ги исполнуват условите ќе може да аплицираат на негативната аукција и со тоа очекуваме избор на најповолен понудувач, односно изведувач на Домот на стари лица во Кочани„ изјави градоначалникот на Кочани, Владко Гроздаднов.
Изградбата на Домот на стари лица во Кочани, ќе чини околу 226милиони денари, средства обезбедени преку унгарскиот кредит. Согласно планот, откако ќе започнат градежните активности објектот се очекува да биде готов за две години.
