Македонската влада е целосно ангажирана за изнаоѓање решение на проблемот. Како дел од напорите, во Загреб, вицепремиерот и министер за транспорт Александар Николоски разговарал со неговиот хрватски колега Олег Бутковиќ.
Николоски потенцирал дека проблемот е суштински и се однесува на транспортниот сектор во целиот регион на Западен Балкан. Тој нагласил дека станува збор за прашање со поширок обем, кое ги опфаќа и компаниите од ЕУ што инвестирале во Западен Балкан, а се извозно ориентирани кон европските пазари.
Во таа насока, Николоски побарал силна поддршка од Владата на Хрватска за изнаоѓање соодветно решение на ниво на Европската Унија, со кое ќе се олесни работењето на македонските и регионалните превозници. На средбата се разговарало и за унапредување на соработката во транспортниот сектор, особено во железничкиот со можност за набавка на нови возови и локомотиви, како и за модернизација на возниот парк за потребите на „Македонски железници – Транспорт“.
Николоски и Бутковиќ разговарале и за зголемување на економската и трговската соработка, со фокус на инфраструктурните проекти во кои има можност да учествуваат и специјализирани компании од Хрватска, како и за потребата од силна поддршка за Македонија во евроинтегративните процеси.
