Со засилена динамика продолжуваат да се изведуваат градежните зафати на автопатот Охрид – Кичево. За првпат во Македонија, но и во поширокиот регион, на оваа траса се применуваат напредни градежни решенија за стабилизација на теренот, со цел автопатот целосно да се доизгради и да се стави во функција како безбедно сообраќајно решение. Денеска увид во градежните активности извршија министерот за транспорт и врски, Александар Николоски, директорот на Државни патишта, Коце Трајановски и пратеникот Ѓорѓи Сајкоски.
„Досега многу се зборуваше за тежината на овој проект, но денес јавноста може директно да види зошто станува збор за најкомплексниот инженерски зафат, не само кај нас, туку и во регионот. Работиме на пробивање на планински масиви, на косини високи и до 200 метри и на терени што постојано се движат кон главната траса – проблеми кои повеќе од една деценија не биле системски решавани“, изјави министерот за транспорт и врски Александар Николоски.
Од формирањето на новата Влада, решени се вкупно 16 критични косини долж трасата. Кај најголемиот дел од нив се применува метод на стабилизација со заштитни галерии, техника што досега не била користена во домашната, ниту во регионалната патна инфраструктура.
„Како се изведуваат работите на два клучни проекти на овој дел, односно асватлирањето од Пресека, значи од Извор па се до Врбјани и вториот дел на пролет ќе почне од Ботун, околу пет километри, вкупно 15 километри, така да со тоа, сите оние кои патуваат од Охрид и према Охрид, ќе имаат еден подобар и побезбеден пат на патување“, изјави Коце Трајановски, директор на „Јавното Претпријатие Државни патишта“.
„Станато е огромно градилиште кое веруваме дека набрзо ќе биде едно прекрасно патно решение за граѓаните од овој регион. Можам да порачам до граѓаните дека за брзо ќе имате патно решение ќе имаме побрз проток на стоки услуги и развој на регионот“, изјави пратеникот Ѓорѓи Сајкоски.
Автопатот се гради од 2014. По повеќе од една деценија тапкање во место со претходната влада на СДСМ и ДУИ, и зголемување на предвидената инвестиција од 374 милиони евра, на 598 милиони, изминатите 18 месеци по деблокирање на процесите, конечно над 50% од автопатот е пуштен во употреба.
