Вицепремиерот и министер за транспорт, Александар Николоски, информираше дека рехабилитацијата на магистралниот пат Охрид – Св. Наум, во должина од 24,3 километри, се наоѓа во завршна фаза.
„Проектот има инвестициона вредност од 11,6 милиони евра, обезбедени од буџетот на ЈП за државни патишта. Со рехабилитацијата на оваа главна туристичка сообраќајна делница, ја зголемуваме безбедноста во сообраќајот и ја обезбедуваме квалитетната патна врска од Охрид до манастирскиот комплекс Св. Наум. Овој магистрален пат има и регионално значење, бидејќи го поврзува Охрид со Република Албанија.
До сега, потегот од граничниот премин со Албанија до Пештани, долг 19 километри, е целосно асфалтиран. За зголемување на безбедноста во сообраќајот, извршена е санација на нестабилните косини, монтирана е заштитна челична мрежа и поставена е ограда на дел од патот.
Според договорениот рок, се очекува патот да биде комплетно завршен до крајот на месец јуни, пред почетокот на летната сезона. Останува да се доасфалтираат околу 5 километри, од излезот на Пештани до хотелот Метропол, да се постави заштитна ограда и да се постави хоризонтална и вертикална сигнализација.
Со реализацијата на овој проект, не само што ја подобруваме патната инфраструктура во охридскиот регион, туку го подигнуваме и квалитетот на туристичкиот потенцијал и го поттикнуваме економскиот развој на Охрид“, истакна вицепремиерот и министер за транспорт, Александар Николоски.
