Вицепремиерот и министер за транспорт, Александар Николоски, истакна дека од досегашните контроли на над 3100 лиценци во градежниот сектор и урбанистичкото планирање, кај 479 лиценци било констатирано неправилно работење, поради што на овие правни лица ќе им бидат одземени лиценците.
„Оваа листа ќе биде доставена до соодветните институции за понатамошно постапување. Исто така, сакаме да најавиме дека ќе започнеме со законски измени според кои контролите ќе бидат задолжителни на секои шест месеци, а не како досега, на доброволна основа. За следните контроли, жалбата нема да го одложи извршувањето на мерките – суспензијата ќе биде веднаш извршена. Целта не е да се казнуваат компаниите, туку оние кои доброволно ги прифатиле условите предвидени со законот да ги исполнуваат постојано. Причината за оваа промена е што компаниите во моментот на поднесување на барањето ги исполнуваат условите, но потоа престануваат да ги исполнуваат. За да нема недоразбирања, контролните инспекции ќе се фокусираат на лиценците во делот на бројот на вработени, квалитетот на изведувањето и навременото извршување на обврските, додека за квалитетот на градбите постојат соодветни надзори“, рече вицепремиерот Николоски.
