Независниот кандидат за градоначалник на Струга, Менди Ќира, заедно со министерот за здравство Азир Алиу, ги посетиле Специјалнизираната болница за нефрологија, Здравствениот дом и Општата болница, соопшти денеска прес-службата на Ќира.
За време на посетата, според информацијата, одблиску се запознале со условите во кои функционира здравствениот систем во Струга и ги слушнале барањата и потребите на здравствените работници.
Ќира, како што е наведено, истакнал дека, иако локалната самоуправа нема директни надлежности во областа на здравството, сепак е обврска на градоначалникот да иницира, бара и спроведува проекти што ќе придонесат за подобрување на условите во здравствените установи.
– Струга заслужува здравствени институции со современи стандарди и одговорното локално управување може да направи многу повеќе за тоа да стане реалност. Грижата за здравјето на граѓаните е темел на едно здраво општество и тоа е еден од моите главни приоритети, како иден градоначалник на Струга, изјавил Ќира.
Министерот за здравство, Алиу пак посочил дека подобрувањето на инфраструктурата и зајакнувањето на човечките капацитети во здравствените институции во Струга е неопходно, и оти секој чекор во таа насока мора да се реализира во тесна соработка со локалната власт.
